教師 (二)

繼續返教師呢個題目. 上次提過幾位o係我人生遇到極品教師, 呢家逐個講下:

第一個: 中學教我chemistry, 係一個男教師但擁有女人特質, 偏心到出汁

呢位呀蛇好偏心, 但係佢偏心得好奇怪. 大家一定會話佢梗係偏心o的成績叻o既學生, 錯!!!! 佢係偏心o的識擦鞋o既學生(唔知點解連做學生都好似做公公甘要學奉承o的老師), 某幾位學生名列後排, 但係上堂時好識做, 例如做實驗會幫呢位呀蛇拎呢樣拎過樣, 有次呢位阿做實驗整損手指, 即刻有位公公九秒九遞上膠布, 勁!!! 又或者學是非同呢位阿蛇講呀邊個邊個同學講佢壞話等等. 人係喜歡比人奉承o既, 難得有人肯好似公公甘奉承自己, 將自己抬到天甘高, 邊個會唔想??!! 但係負責抬o個個咪一世都係公公囉!

另外, 呢位阿蛇o既心情就等同天氣一樣, 變幻無常, 心情好o個日, 佢會全堂四萬甘口, 就算全班測驗成績差到貼地, 都會笑住來話我o地. 心情差o個日就大鑊, 睇下邊個唔好彩 (當然班公公通常都免疫), 就會比佢篤住來鬧. 呢位阿蛇每次鬧人o既用語都幾人生攻擊, 曾經講過一句令我印象幾深刻. 記得班上有位男生, 成績一向都係包尾o個幾位但係又唔肯做公公, 有次呢個阿蛇宣佈測驗包尾, 跟住叫呢位男生出去拎返份測驗卷同佢講: "其實好想訪問一下你呀爸呀媽點生到你甘, 可以次次都甘差, 你呀爸呀媽做o野係咪都係甘差?"

有次上心理學課堂, 講師提到喜歡人生攻擊o既人, 本身都可能受過某程度上人生攻擊. 若所承受o既人生攻擊不太嚴重, 同人溝通就會作出相對人生攻擊行為. 但係若經常受到人生攻擊辱罵, 可能會物極必反, 做出暴力犯罪行為. 唔知點解不其然就想起呢位阿蛇, 佢應該係輕微o個款. 其實鬧學生都好正常, 但係點解連人o地呀爸呀媽都要拎埋出來講? 這只不過係有禮貌o的甘去問候人o地父母, 同講粗口有咩分別?

其實教師都係人, 都有七情六慾, 但係為人師表係咪應該自我調節一下, 就算鬧學生都唔好拎埋學生個家長出來鬧. 學生有樣學樣, 禮貌o的就會好似佢甘鬧人話埋人o地父母, 無禮貌o個o的咪爆四字真言. 縱容學生o係學校上演金枝欲孽, 唔駛成績好只要識擦鞋都可以有著數. o的學生到出來社會工作, 就可以咩都唔駛做或者 hea 做, 靠擦鞋呃飯食.

就係有上一代甘o既教師, 先出到呢一代o既教師 (公共場所用粗口鬧警察o個位)!!!!

有興趣可看看呢篇有關受到人生攻擊後o既反應, 幾有趣: http://data.book.hexun.com.tw/chapter-18516-2-15.shtml


第二個: 同事o既另一半, 問題o係我同事身上, 佢同得我同事一齊, 佢都應該係一個奇/騎呢人

其實呢位教師只係見過一面, 所以對佢認識真係不太深. 但係佢頂得住我個同事, 可以同佢一齊仲話要結婚, 我真係 r 爆頭.....

我同事係:
1. 孤寒到無人有, 但係唔會放過貪人o地著數機會
2. 表達能力有問題, 無論平日溝通又或者開會聽佢講o野, 個個人都皺晒眉頭, 要請佢supervisor代講多次先明
3. EQ 甚低, 與別人有小磨擦就會爆粗
4. 永遠有咩事都係別人錯, 佢對


甘對我同事o既另一半疑問係:
1. 孤寒到無人有, 但係唔會放過貪人o地著數機會  < 係咪都係甘比我同事呃著數?
2. 表達能力有問題, 無論平日溝通又或者開會聽佢講o野, 個個人都皺晒眉頭, 要請佢supervisor代講多次先明 < 點樣同我同事溝通? 係咪都要經佢supervisor 去講解?
3. EQ 甚低, 與別人有小磨擦就會爆粗 < 同我同事鬧交, 係咪都比我同事用粗口鬧?
4. 永遠有咩事都係別人錯, 佢對  < 係咪咩都係錯, 得我同事係對?


雖然想不通, 不過一對情侶又或者夫婦, 可以維持到都係一凹一凸. 祝佢o地好運, 現今可以找到另一半已經不易, 可以簽紙, 一起走埋餘生(離婚唔計) 更加不易.

今次篇幅太長, 第三位騎呢教師留待下篇繼續!