社交網站的用途

正面睇用社交網站多用於:

(1) 識朋友/找回舊朋友
(2) 分享
(3) 玩遊戲
(4) 消磨時間
(5) 轉載新聞或消息
(6) 聊天

從另一面去睇, 社交網站有以下用處:

(一) 晒命

乜都晒, 總之覺得可以showoff 自己就晒.

例一: 晒新手袋, 新杉, 新鞋, 新電玩, 咩新o野都晒

例二: 晒去旅行坐商務客位, 旅行戰利品, 住高級酒店

例三: 晒去高級地方食飯, 高級食物

有種人真係晒得起, 因為確實有錢有品味, 甚至一o的有錢人乜都唔晒, 我覺得佢o地好高尚. 但搵錢唔多, 一屋仔女要養, 連住地方都唔夠都仲要晒, 真係想勸佢o地儲返個錢比仔女讀書, 唔好買甘多無謂野去晒命.

(二) 晒幸福

晒幸福多數係有另一半, 多數係女.

例一: 晒下個老公/男友送花/禮物, 同老公/男友屋企玩煮飯仔, 生日/紀念日同老公/男友去慶祝, 送比老公/男友自製禮物, 未婚就會晒男友向自己求婚, 晒下隻求婚介子/束花.

例二: 晒下自己幾甘愛對方, post o的肉麻句子/甜言密語

通常都會祝福佢o地, 不過晒肉麻真係好要命, 應該顧及一下閱讀者感受, 我唔係佢愛人, 我只會覺得呢o的人唔知醜, 打情罵悄都要公開比人知, 更進一步o既o野係咪都要公開比人知?!!

(三) 晒仔晒女

晒自己仔女, 多數係父母, 都係以女性比較多.

例一: 晒仔女幾多日/個月大

例二: 晒仔女出街玩o既樣

例三: 晒仔女參加某比賽, 拎o左咩獎

例四: 晒仔女考到咩咩咩學校

可能本身我唔鐘意細路, 所以真係好反感. 尤其係報導仔女幾多日/個月大, 耐唔時見一次都ok, 日日or 定期見到真係覺得煩, 你話比人知你個仔女幾大有咩實際作用???

(四) 晒貓晒狗

同晒仔女一樣, 不過有男有女.

例一: 晒同狗狗去玩

例二: 晒下買咩新玩具/用品比貓/狗

晒貓狗我比較喜歡, 一來同自己有關, 二來無甘煩(我未見過有人keep住比人知自己隻寵物幾多日/個月大). 但係以前見有人不停重覆又重覆晒自己隻貓同一樣o野, 真係睇到想嘔. 另外仲有一個就係晒貓為搏上鏡, 留意到佢出盡辦法宣傳隻貓, 其實係想令自己有多o的出鏡機會, 仲要話曾經有星探對佢有興趣, 盲都睇得出佢晒貓為發明星夢. 

(五) 晒自己

不停晒自己個樣, 女性為主.

真係好有自信先做得出, 我最怕係見到自拍大頭相, 仲要係年紀有返甘上下, 真係幾流汗.

(六) 博同情

報導自己慘況, 見得最多係話病o左.

病係好慘, 搏得人同情可能對病情有幫助. 有一個例子好有趣, 話說某某時常感冒, 次次都話比人知佢病, 點知有次有另一個人回覆, 就係叫佢"病就要多休息, 病就唔好玩 facebook". 真係一語道破, 病仲學咩人玩 facebook, 有精神post o野即係唔係好病啦, 哈!

(七)  傳導

宣揚所屬教派理論, 以教徒為主.

我無信任何教派, 所以見到係覺得... 勁煩. 以前讀書時已經成日有人向我傳導, 如果我係有興趣就一早入會. 況且信教都係一種心靈慰藉, 我暫時都唔需要. 

(八) 八卦

純粹開個戶口, 永遠唔會透露自己任可狀況, 淨係睇其他人狀況.

呢種人無咩好 comment, 只可以話佢無貢獻, 淨係識八卦他人但又唔比八卦佢.

(九) 罵戰

朋友之間鬧翻, 或者情侶分手, 互想展開影射/對罵.

呢種情形都係剝花生睇戲算, 如果留言幫某一邊會演變到加入戰團, 自尋煩惱.

吾家二女 - 霞姨