極品新人

其實我唔係好想標籤 "80 後"呢個term, 但在我人生工作中, 確實遇過唔少古怪騎呢 "80 後". 今次想講下職場上遇到最新 "80 後", 呢位人兄我用 "黑面人"來作為佢稱呼.

黑面人來o左都有大半年時間. 初來報到時, 好老實, 我真係覺得佢有個 "怪" 字刻o係額頭. 因為

1. 問一句答一句, 就算 open end question, 個答案都係得幾個字
2. 問佢平日有咩嗜好, 答案係無
3. 問佢平日放工會做咩? 打機? 上網? 答案係無
4. 問佢有無咩運動嗜好? 答案多幾個字 - 我唔運動
5. 對於其他人話題, 唔會插嘴, 只會靜靜坐o係到

甘點解叫佢做黑面人呢? 話說一直好好地, 叫佢做o野都 ok, 亦都有面露笑容. 佢亦都係一個叻唔切既人, 無錯, 佢唔多講o野, 但係一有機會表現自己就會講多兩句o野. 但係忽然有一日, 叫佢做o野, 佢開始黑面. 如是者, 持續o左一個多星期佢都係一樣, 咩到黑面, 黑面, 再黑面. 我唯有招佢入房, 問下佢係咪有咩不滿, 有無與同事相處問題, 又或者唔喜歡現有工作, 又或者係咪有o的私人事, 但每條問題佢都係答一句: 無事/ 無野/ 無不滿.

問唔到答案, 為大局著想, 我唯有問下其他同事, 睇下有無人得罪過佢, 又或者做過o的咩令佢不悅. 其他同事都不約而同話覺得黑面人多o左黑面, 但係究竟發生咩事令佢甘, 同事A 將佢覺得有關過程話我知. 某天同事 B過來問同事C book o左間房係咪唔用, 因為話當時唔見間房有人, 想借用, 就o係呢刻, 黑面人就叻唔切對同事A 話同事C 去o左開會(註: 黑面人並不是同事 C 下屬, 理論上黑面人唔應該知同事C 去o左開會). 同事A 應o左黑面人一句: 我知同事C 唔o係位好耐, 佢係去o左開會, 不過係想知佢係咪去o左間房開會o者, 因為人o地想用間房. 
同事A 回想好似就係呢刻之後, 發覺黑面人開始常黑面, 同事A 叫佢做o野, 佢亦都黑面. 不過大家唔明, 就算同事 A 得罪佢, 其他人何罪之有呢? 點解對其他人都黑面呢? 事實上同事A 唔覺得自己o既說話有咩問題, 都係一般語氣, 所以根本唔覺點解呢句說話會得罪黑面人. 

事情發生都有一個月, 初初見到黑面人真係唔知佢想點, 話晒同一間公司朝見口晚見面, 都想佢可以對同事歡顏o的, 唔好影響其他同事. 不過傾又傾過, 勸又勸過, 佢依然喜歡黑面又或者目無表情, 搞到自己自成一角, 其他同事亦自自然然當佢透明. 其實到呢刻, 我都唔知黑面人發生咩事, 可能真係如同事A所講, 一句無心說話得罪o左佢. 

一本叫 "大肚量, 快樂學" o既書, 入面講到有一類人對於別人無心之話, 可以茗記於心, 嬲足一世, 而呢類人內心亦因長期記掛著憤怒回憶, 會保持著唔開心情緒. 高手者就不動聲色, 低手者就如黑面人, 長掛黑面. 另一本"惡魔讀心術" 入面亦提到, 當某人說話目無表情, 其內心不滿程度亦相當嚴重. 

與朋友傾開, 覺得黑面人本身屬於"叻唔切"種類, 所以喜歡自我表現, 亦會好重視別人對自己看法. 若真係如同事A 所講, 黑面人就覺得自己o既"叻唔切" 比人一o野打沉, 咩面都無晒. 之後就如上面兩本書內容所提到, 黑面以示不滿. 

其實我覺得新一代好多時都EQ 比較低, 用黑面來表示不滿, 又或者好聽o的, 咩都寫晒o係面上, 唔駛估都知佢諗乜. 不過工作地方始終唔係屬於一個人地方, 要同其他人合作, 係咪應該提高一下自己EQ, 無論對自己或對別人都有好處. 點解呢類人連甘都諗唔通?