姣婆守唔到寡

姣婆守唔到寡 - 相信好多人都明白箇中意思, 就係口口聲聲話唔會點點點, 但係又忍唔住會點點點.

有一位中學同學, 我o地讀中學時都已經好憎細路仔, 大家言談期間誓神劈願話點都唔會生仔. 到出來返工, 耐唔時都有同呢位舊同學chat 下, 知道佢結婚, 恭喜佢之餘都會問佢會唔會生仔, 佢話唔會, 就算老爺奶奶迫都唔會, 同埋佢依然覺得細路仔好煩. 好喇, 大約佢結o左婚兩年左右, o係 facebook 見到佢話有o左, 好奇下chat 佢問下點解佢生仔, 點知佢話細路仔好得意呀, 覺得有細路好開心 (下刪1000 字....).

- 呢個時勢已經好難找到志同道合(唔生仔)人士, 身邊唔少朋友都係為生仔而生仔, 覺得拎o的仔女出來係代表威, 有仔女先係有本事有成就. 我會心底道出一句, 等到你老而o的仔女仲肯照顧你, 唔攤大手問你拎錢, 你先好覺得威啦.

約一年前有次去完歐洲旅行返來, 同事一齊聽我分亨經歷, 同事A 聽完話唔會去囉, 甘遠要搭好耐飛機, 好辛苦囉又無o野玩, 淨係去睇景有乜好玩. 點知同事A o係復活節就飛o左去歐洲玩十數天!!!

- 呢位同事 A 一直都係去開短線亞太區旅行, 平日為人極孤寒, 所以不嬲對於別人去歐洲旅行會覺得係徙錢. 唔通佢今次去歐洲旅行可以平得過去短線亞洲團??!!!

舊同事 I 有兩個女, 大女約4-5 歲, 佢每次出門去旅行, 就會o係面書留言話好唔捨得兩個女, 去埋今次就有排都唔會再去, 點知唔夠半年, 又見到佢話去旅行o既留言.

- 其實唔捨得o的細路, 真係可以唔駛去旅行, 無人會用支搶指住迫佢去. 次次去完話為o左兩個女下次唔會去, 但係事隔無耐又去, 甘講來做咩呢!!

舊貓友 M 話佢屋企o的貓老喇, 其中一隻貓同佢o地相處仍有好大問題, 雖要長時間令隻貓改觀, 重新同屋企人建立返好關係, 所以都唔會再領養新貓. 點知無耐, 舊貓友 M 叫我幫手傳心同佢屋企o的貓話有新貓領養返屋企, 仲要係兩隻新貓!!!!

- 明知屋企o的貓有問題, 仲要領養新貓, 有心幫流浪貓係好, 但係咪應該檢討下自己實際係咪有能力搞得掂, 明知o的舊貓唔開心都仲要帶新貓返屋企. 可憐有問題o個隻貓只可以繼續唔開心.

早幾年同另一位舊貓友 H 傾開話我有捐款比愛協, 佢話一定唔會幫助流浪貓, 連去餵流浪貓都唔會, 佢解釋話唔係無愛心, 而係近年好多流浪貓健康狀況比較差, 如果去幫助流浪貓, 就會助長更多有病貓出現, o的貓都會好痛苦. 但事隔一年, 舊貓友 H 話開始上山幫義工餵流浪貓, 仲問我有無唔要舊貓糧可以捐贈幫助流浪貓!!!

- 呢種幫助流浪貓都係好事, 個問題係點解初初口口聲聲話唔幫, 但之後又自打嘴巴同甘積極??!!!

其實講o野唔駛甘絕對, 好多o野都話唔埋, 今日唔會做, 唔代表明日唔會做, 為自己留一線, 最少唔會被灌上姣婆守唔到寡之名.